Ég á bilaða þvottavél og einnig beyglaðan og laskaðan bíl og eldgamalt túbusjónvarp, EN í dag tel ég blessanirnar í lífi mínu og ég næ ekki að telja þær allar, þær eru svo margar, sumar búa með mér og veita mér endalausa gleði og hamingju, sumar eru fluttar að heiman frá mér en veita mér líka endalausa gleði og hamingju. Sumar þeirra eru tengdar mér með genatískum hætti aðrar ekki en blessa líf mitt margfaldlega. 

Mannfólk er alltaf að velta fyrir sér tilgangi lífsins alls, í mínum litla heimi hef ég þá trú Í DAG, að tilgangurinn sé ást og kærleikur sem ég veit og sé allt í kring um mig að hefur hvað mest áhrif á líf okkar allra. Ást og/eða ástleysi og kærleikur og/eða kærleiksleysi mótar í raun alla okkar umgjörð og það hvaða áhrif við höfum á samferðafólk okkar sem og komandi kynslóðir.

Ég hugsa um jólin án þess að hafa svo sem neina helgislepju yfir þeirri hugsun en þau fá mig til að huga að atriðum eins og hér koma fram í þessu bloggi. Þau fá mig til að huga að blessunum í mínu lífi sem einmitt lúta, þegar upp er staðið alls ekki að veraldlegu ríkidæmi sem ég trúi þó að mér hlotnist á hverjum þeim tíma sem "þörfin" kallar á og í því mæli sem "þörfin" kallar á. Það hvort frelsarinn minn hefur örugglega og útmælanlega fæðst á þeim degi sem við mynnumst fæðingar hans skiptir mig ENGU MÁLI, eða hvort jólahátíðin hefur sprottið upp úr einhverri annarri hefð skiptir mig heldur engu máli. Jólin hafa sterka þýðingu í mínu lífi og hafa alla tíð haft svo það er mergurinn málsins, þau fá mig til að hugsa, elska og njóta.

OG ég fer í rauða fallega doppótta kjólinn minn um jólin, hann er ekki í sama númeri og ríkistölurnar segja til um fegurð eða hamingju, en ég brýt þá bara slíkar mýtur á bak aftur og ég tel líkama minn (í þeim frávikstölum sem hann er staddur í) með blessunum í lífi mínu. Mér dettur ekki í hug að tala illa um líkama minn, hann er sú umgjörð sem mér hefur verið gefin um það sem ég er, með þeim kílóum sem mér hafa hlotnast með árunum vegna skynsamlegra og óskynsamlegra ákvarðana á degi hverjum. Hann ber ör sem segja hluta af minni sögu og fyrir þeirri sögu ber ég virðingu í dag. Ör eru oftar en ekki merki um að sigur hefur unnist á einhverju, ör eru merki um að eitthvað hefur náð að gróa.

Ég óska ykkur gleðilegra jóla, ég þakka fyrir samverustundir okkar á árinu sem er að líða eða enn eldri samverustundir þar sem þið hafið örugglega náð að snerta líf mitt á einhvern hátt. Ég óska ykkur farsældar á komandi ári og þess að þið megið telja blessanir ykkar oft eða sjaldan allt eftir því hvað ykkur hentar.

Kveðja Ingibjörg